नेपाली कांग्रेसका उपसभापतिका उम्मेदवार चन्द्र भण्डारीले ८० वर्ष हाराहारीका शेरबहादुर देउवालाई पार्टी सभापतिको भारी बोकाउनु अन्याय हुने जिकिर गरेका छन् ।
नेपाली रेडियो नेटवर्क (एनआरएन) को कार्यक्रम नेपाली बहसका लागि पत्रकार ऋषि धमलासँग कुरा गर्दै नेता भण्डारीले भने, “शेरबहादुरजी हाम्रो आदरणीय नेता हो । उमेरले ८० को हाराहारीमा पुग्नुभयो । यो उमेरमा उहाँलाई प्रधानमन्त्री र पार्टी सभापति दुवै पदमा दिनु बोझ हुन्छ, उहाँमाथि अन्याय हुन्छ । एउटै व्यक्तिलाई सधैं सबै पद दिनुपर्छ भन्ने मलाई लाग्दैन ।
नसक्ने भारी शेरबहादुरजीलाई बोकाएर किन फेरि असफल बनाउने ? सबै नेता कार्यकर्ता साथीहरुको भनाइ यही छ ।”नेता भण्डारीले सत्ता र शक्तिले महाधिवेशन प्रतिनिधिहरुको मन र मस्तिष्कलाई बिगार्न नसक्ने दाबी गरे । उनले थपे, “हाम्रा नेताहरु बारम्बार सत्तामा जाने पार्टीको नेता पनि बन्न नसक्ने, देश पनि चलाउन नसक्ने अवस्था रह्यो । कृष्ण सिटौला र शेरबहादुरजीले भन्ने कुरा एउटा हो ।”
उनले आफ्नो समूह पहिलो चरणमै सभापतिमा जित्नेमा विश्वस्त रहेको जनाउँदै दोस्रो चरणमा गए पनि डा. शेखर कोइराला विजयनजिक रहेको बताए । उनले भने, “बाहिरको विश्लेषण दोस्रो चरणमा जान्छ भन्ने छ । तर पहिलो चरणमै हाम्रो समूहले विजय हासिल गर्छ कि भन्ने लाग्छ ।”
रामचन्द्र पौडेल र शेखर कोइराला पनि आफ्नै समूहमा रहेको उनले बताए । उनले भने, “हामी अहिलेसम्म रामचन्द्र पौढेल समूह भनेर नै आएको हो । उहाँलाई हामीले कि मिलेर उठ्नोस् कि उम्मेदवारी नदिनोस् भनेका हौं । मलाई लाग्छ, रामचन्द्रले आफ्नो समूहलाई कमजोर बनाउनु हुन्न । उहाँले सहयोग नगर्ने भन्ने कुरा बाहिरको अफवाह हो । उहाँले आफू उम्मेदवार नभएपछि भोट माग्ने कुरा आउँदैन । डा. शशांक कोइरालासँग हिजो बिहान पनि हामी सँगै थियौं । हाम्रो सहकार्य टुट्ने भन्ने कुरा नै हुँदैन ।”
शेरबहादुर देउवा रामचन्द्र पौडेलकहाँ जानु असल संस्कार भएको पनि भण्डारीले बताए । उनले भने, “शेरबहादुरजी रामचन्द्रकहाँ जानु हाम्रो असल संस्कार नै हो । एक नेताले अर्काे नेतालाई आदर गरेको कुरालाई हामी सबैले मनन गर्नुपर्छ ।”
नेता भण्डारीले पार्टीलाई नयाँ नेतृत्व, नयाँ विचार र नयाँ दृष्टिकोण चाहिएको बताए । उनले भने, “नयाँ विचार, दृष्टिकोण र अनुहारले पार्टी र देशलाई बदल्न सक्छ । त्यसैले हामीले नेतृत्व परिवर्तनको एजेन्डा हामीले अघि बढाएका छौं । यसले कांग्रेसको तल्लो तहसम्म आशा जगाएको छ । भोलि अरु पार्टीसँग प्रतिस्पर्धा गर्नुपर्छ । पन्ध्रौं महाधिवेशनमा नेतृत्व गर्ने युवा हामीसँग छन् ।”
