गल्ति पिटिने डाक्टर र निलम्बित प्रहरी दुवैको होइन, गल्ति त प्रणालीको हो : डा. तोसिमा कार्की

गल्ति पिटिने डाक्टर र निलम्बित प्रहरी दुवैको होइन, गल्ति त प्रणालीको हो  : डा. तोसिमा कार्की

काठमाडौं । राष्ट्रपति विद्यादेवी भण्डारीको शुक्रबार भएको सवारीका क्रममा चिकित्सक पिटिएको घटनालाई लिएर अतिविशिष्ट व्यक्ति सुरक्षा सम्बन्धी प्रावधान सच्याउनुपर्ने आवश्यकता देखिएको सांसद् डा. तोसिमा कार्कीले बताएकी छन् ।

उनले सामाजिक सञ्जालमा एक भिडियो सन्देश जारी गर्दै भनेकी छन्, ‘डाक्टर एक प्रतिबिम्ब पात्र मात्रै हुन्, खासमा ती सुरक्षाकर्मी पनि यही प्रणालीको शिकार बनेका छन् ।’एक सर्वसाधारण त्यहाँ उभिएको भए पनि लाठी प्रहार हुन्थ्यो भन्दै उनले भनेकी छन्, ‘यसको घटना के कारणले भयो भन्नेतिर खोजी गर्नुपर्छ ।’

उनले चिकित्सकले आइतबार देशभर गरेको हड्तालको पनि विरोध गरेकी छन् । चिकित्सकको बन्दले लाखौं विरामी मर्कामा पर्ने भन्दै उनले भनेकी छन्, ‘शुक्रबारको घटनामा गल्ती न ड्यूटीमा खटिएका डाक्टरको थियो । न त आदेश अनुरुप लटठी चार्जसम्मको निर्देशन पाएको ड्यूटीमा खटिएका प्रहरीको थियो ।’

Europass CV in Nepal

उनले जनप्रतिनिधिले बनाएको भीभीआईपी सुरक्षा प्रोटोकलको गल्ती भएको बताउँदै अगाडि भनिन्, ‘प्रोटोकलहरु देशमा सुशासन र समृद्धि स्थापित गर्न बनेका हुन् भने यसमा सुधार गर्न जरुरी छ । कुनै पेशकर्मी र नागरिकलाई बाधा नहुने गरी हुनसक्नेसम्म लचकता अपनाइ हरेक नेपालीले स्वीकार्न सक्ने र पालना गर्नसक्ने नीति निर्माण बनाउन जरुरी छ ।’

शुक्रबार राष्ट्रपतिको सवारीमा सडकमा निस्किएको भन्दै ट्रमा सेन्टरका डाक्टर जनिथलाल सिंह कुटिएका थिए । उनलाई दुर्व्यवहार गरेको आरोपमा प्रहरी प्रधान कार्यालय, नक्सालले प्रहरी वृत्त, जनसेवामा कार्यरत प्रहरी वरिष्ठ हवल्दार शम्भुजंग गुरुङलाई निलम्बन गरेर अनुसन्धान गरिरहेको छ ।

शुक्रबार राष्ट्रपति भण्डारीले प्रतिनिधिसभा र राष्ट्रियसभालाई संयुक्त सम्बोधन गर्ने कार्यक्रम थियो । त्यसका लागि शितलनिवासबाट बानेश्वरसम्म आउने क्रममा उपत्यका ट्राफिक प्रहरी कार्यालयले सडक खाली गराएको थियो ।

Europass CV in Nepal