सुदन किराँतीले गरे ९ जना प्राज्ञको नियुक्तिमा ६ जना राई
काठमाडौं । सरकारले तीनवटा प्रज्ञा प्रतिष्ठानका पदाधिकारी नियुक्ति गर्दा अस्वभाविक रुपमा राईहरुको नियुक्ति गरेको छ । संस्कृति पर्यटन तथा नागरिक उड्ययन मन्त्री सुदन किराँतीको सिफारिसमा मन्त्रिपरिषद्ले नियुक्त गरेका नामहरुमा झण्डै आधा राई समुदायका व्यक्तिहरु रहेका छन् ।
नेपाल प्रज्ञा प्रतिष्ठानका ११ पदाधिकारीमध्ये कुलपतिसहित ४ पदाधिकारीहरु राईहरु परेका छन् । जसमा कुलपति भूपाल राई, प्राज्ञहरुमा राजन मुकारुङ, सुमित्रा राई र डा. तारामणि राई रहेका छन् ।
त्यस्तै, ललितकला प्रज्ञा प्रतिष्ठानमा कुलपति नारदमुनि राईसहित ३ जना चयन भएका छन् । प्राज्ञहरुमा सञ्जय वान्तवा राई र चन्द्रकुमार राई नियुक्त भएका छन् । ललितकलामा कुल ९ जना पदाधिकारी चयन भएका थिए ।
संगीत तथा नाट्य प्रज्ञाप्रतिष्ठानमा उपकुलपति शम्भु राईसहित ६ जना नियुक्त भएका छन् । प्राज्ञहरुमा डाक्टर किरात राई, राधा राई, कला राई, भीषण मुकारुङ राई र टीकाराम राई नियुक्त भएका हुन् ।
