काठमाडौं । भारतको अरुणाचल प्रदेशलाई आफ्नो भूमि दाबी गर्दै नक्सा प्रकाशित गरेको चीनले भारतका तीन खेलाडीलाई भिसा दिन अस्वीकार गरेको छ ।
एसियाली खेलकुदमा भारतको प्रतिनिधित्व गर्दै हाङचाओ जान लागेका उसु खेलाडीलाई चीनले भिसा नदिएको हो । खेलाडीहरु अरुणाचल प्रदेशका बासिन्दा भएको बताइएको छ । भारतीय विदेश मन्त्रालयका प्रवक्ता अरिन्दम बागचीले भारतीय नागरिकलाई जातीय तथा क्षेत्रगत आधारमा भेदभाव गरिएको टिप्पणी गरे ।
चीनले जानी-जानी यस्तो कदम चालेको भन्दै उनले कूटनीतिक रुपमा विरोध जनाइएको बताए । भारतले यसलाई एसियाली खेलकुद भावनाको उल्लंघन भनेको छ । केन्द्रीय मन्त्री किरण रिजि-जुले पनि ट्विट गर्दै खेलाडीलाई भिसा नदिइएको विषयको कडा निन्दा गरेका छन् । उसुका खेल पर्सीदेखि सुरु हुँदै छ ।
बेइजिङमा आज आयोजित पत्रकार सम्मेलनमा विदेश मन्त्रालयकी प्रवक्ता माओ निङले कानुनी कागजात भएका सबै मुलुकका खेलाडीलाई चीनले हाङचोउमा स्वागत गर्ने बताइन् ।
गत जुलाईमा पनि ती खेलाडीलाई चीनले भिसा दिएको थिएन, जसका कारण छेङदुमा आयोजित उसु प्रतियोगिताबाट भारतका आठै खेलाडीले नाम फिर्ता लिएका थिए । चीनले सन् २००० को मध्यतिरबाटै अरुणाचल प्रदेशका नागरिकलाई भिसा दिन अस्वीकार गर्दै आएको थियो । २०१४ मा गरेको भारत भ्रमणका बेला पनि चिनियाँ विदेशमन्त्री वाङ यीले सीमाका विषयमा कुनै सम्झौता नगर्ने बताएका थिए । त्यसको जवाफमा भारतले आफ्नो दस्तावेजमा ‘एक चीन’ नीति उल्लेख गर्न छाडेको थियो ।
