श्रीलंकाले माग्यो पुटिनसँग सहयोग
कोलम्बो । आर्थिक संकटको सामना गरिरहेको श्रीलंकाले रुसी राष्ट्रपति भ्लादिमिर पुटिनसँग सहयोगको आग्रह गरेको छ ।
राष्ट्रपति गोटाबाय राजपाक्षले आफ्नो देशमा इन्धन आयात गर्नका लागि सहयोग गरिदिन राष्ट्रपति पुटिनलाई अनुरोध गरेको बताएका हुन् । राष्ट्रपति राजपाक्षले पुटिनसँगको कुराकानी निकै फलदायी भएको बताएका छन् ।
श्रीलंकाका ऊर्जामन्त्रीले देशमा रहेको पेट्रोलियम पदार्थको मौज्दात लगभग सकिएको बताएको केही दिनपछि राष्ट्रपति राजपाक्षले रुसी राष्ट्रपति पुटिनलाई सहयोगका लागि आग्रह गरेका हुन् ।
राजपाक्षले पुटिनसँगको वार्तामा श्रीलंकालाई इन्धन आयातका लागि उधारो लिन योग्य रहेको उल्लेख गरी पत्र दिनका लागि आग्रह गरेको बताए । ‘दुई देशबीचको मित्रवत् सम्बन्ध थप बलियो बनाउन पर्यटन, व्यापार र संस्कृतिलगायतमा द्विपक्षीय सम्बन्ध सुदृढ बनाउन हामी सहमत भएका छौं,’ राजपाक्षले ट्वीटरमा लेखेका छन् ।
