सन्दीपको बचाउ गर्दै विनोद दासले भने, ‘ठोस प्रमाणविना आरोप लगाउनु गलत’
पूर्व क्रिकेटर तथा क्रिकेट एसोसिएसन नेपाल (क्यान)मा आबद्ध क्रिकेट म्यानेजर विनोद दासले राष्ट्रिय टीमका कप्तान सन्दीप लामिछानेको बचाउ गरेका छन् । ठोस प्रमाण र आधारविना आरोप लगाउनु लगत भएको उनको भनाइ छ ।
लोकान्तरसँग संक्षिप्त कुराकानी गर्दै दासले भने, ‘कुनै आधार र ठोस प्रमाणविना आरोप लगाउनु गलत हो ।’ कुनै व्यक्तिको करीयरभन्दा पनि दुईवटा परिवारको विषय जोडिएकाले त्यसमा गम्भीर हुनुपर्ने उनको भनाइ छ ।
यस विषयमा छलफल गर्न क्यानको बोर्ड बैठक बस्ने तयारी भएको दासले बताए । क्यानले सन्दीपसँग यसबारे कुराकानी गर्न बाँकी नै रहेको उनले खुलाए । ‘उहाँ (सन्दीप)सँग कुराकानी हुन पाएको छैन । हामीले पनि राति मिडियाबाट थाहा पायौं, अहिले उता (वेस्टइन्डिजमा) राति भएकाले कुराकानी हुन नपाएको हो,’ दासले लोकान्तरसँग भने ।
१७ वर्षीया किशोरीलाई काठमाडौंको एक होटलमा लगेर पटक–पटक जबरजस्तीकरणी गरेको आरोप सन्दीपमाथि छ । किटानी जाहेरी परेपछि प्रहरीले पीडितको स्वास्थ्य परीक्षण गराएको छ भने घटनाका सम्बन्धमा सूक्ष्म अध्ययन भइरहेको जनाएको छ । पीडितका तर्फबाट मंगलवार प्रहरी वृत्त गौशालामा किटानी जाहेरी परेको हो । सन्दीप हाल क्यारेबियन प्रिमियर लीग खेल्न वेस्टइन्डिजमा छन् ।
