अराजक समूहको उदाहरण भनेको काठमाडौँका मेयर बालेन साह र रवि लामिछाने हुन् : एमाले नेता महेश बस्नेत
७ असोज, काठमाडौं । नेकपा एमालेका युवा नेता महेश बस्नेतले सामाजिक सञ्जालको दुरुपयोग गरी युवाहरुमा भ्रम छर्ने काम भइरहेको आरोप लगाएका छन् राष्ट्रिय युवा संघको प्रचार भेलामा नेता बस्नेतले पछिल्लो समय सामाजिक सञ्जालको दुरुपयोग गरी विभिन्न समूहले युवाहरुमा भ्रम छरेको भन्दै युवा संघले निराशाको भ्रम छर्ने समूहलाई परास्त गर्नु पर्ने बताए ।
‘अराजक समूह अहिले भौतिक रुपमा वा साइवरमार्फत माओवादीे, वाईसीएल, कांग्रेस, नेविसंघ, भीम उपध्याय भएर, खगेन्द्र संग्रौला, बालेन साहहरु भएर र रवि लामिछानेहरु भएर विभिन्न रङ्गीचङ्गी कुराहरु बोकेर प्रकट हुन्छन्,’ उनले भने ।
नेता बस्नेतले नेपालमा राजनीतिक अस्थिरता फैल्याउन पार्टीका नेता कार्यकतालाई समाप्त पार्नेगरी महाशक्ति राष्ट्रका खेताला र गोठालाहरु उत्पादन गर्न विभिन्न समूह लागेको बताए । नेता बस्नेतले आगामी निर्वाचनलाई लक्षित गरी एमाले माथि जथाभावी आक्रमण भइरहेको बताए । नेता बस्नेतले आफूलाई नक्कली आइडीमार्फत ८ हजार १ सय जनाले गाली गर्ने गरेको बताए ।
