काठमाडौँ । विश्व प्रसिद्ध आरोही निर्मल पुर्जाको रेकर्ड तोड्न भन्दै नेपाल आएकी प्रसिद्ध नर्वेजियन हिमाल आरोही क्रिस्टिन हरिला आफ्नो प्रयास असफल भएपछि स्वदेश फर्किएकी छन् ।
८ हजार मिटरभन्दा अग्ला १४ वटा हिमाल ६ महिनाको अवधिमै आरोहण गर्ने अठोटका साथ नेपाल आएकी हरिला चीनको अनुमति नपाएपछि आफ्नो आरोहण प्रयास अर्को वर्षका लागि थाती राख्दै फर्किएकी हुन् । यद्यपि हरिलाले १४ मध्ये १२ वटा हिमाल आरोहण गरिसकेकी छन् । उनले १४ हिमालको यात्रा सम्पन्न गर्न चोयु र सिसापाङमा हिमाल आरोहण गर्नुपर्ने थियो । तर ती दुई हिमाल आरोहण गर्नका लागि चीनको बाटो मात्रै सहज मानिन्छ ।
तर हरिलाका लागि ती हिमाल आरोहण गर्न चीनले अनुमति दिएको छैन । चीनले अनुमति नदिए पनि उनले ती दुई हिमालको आरोहणका लागि नेपालतर्फबाट पनि प्रयास गरेकी थिइन् । तर खराब मौसमका कारण सफल हुन नसकेको हो।
स्वदेश फर्किँदै गर्दा हरिलाले आफ्नो नियन्त्रण बाहिरको कारणले चीनबाट अनुमति प्राप्त गर्न नसकेको प्रतिक्रिया दिएकी छन् । तर उनले यसका लागि अर्को वर्ष ६ महिनाभित्रै प्रयास गर्ने बताएकी छन् ।
‘यस प्रक्रियामा हामीले कुनै कसर बाँकी राखेका छैनौं, यसका लागि सबै सम्भावित उपायहरू सकिएका छन् । तर दुर्भाग्यवश हाम्रो नियन्त्रण बाहिरका कारण हामीले समयमै अनुमति प्राप्त गर्न सकेनौ,’ हरिलाले भनेकी छन् । उनी हाल नर्वे फर्किसकेकी छन् ।
हरिलाले आफ्नो आरोहणको क्रममा सहयोग गर्ने शेर्पाहरूलाई धन्यवाद समेत दिएकी छन् । उनको १२ हिमाल आरोहण सफल बनाउन पासदावा शेर्पा र दावा शेर्पाले प्रमुख भूमिका खेलेका थिए ।
२०१९ मा नेपाली आरोही निर्मल पुर्जाले ६ महिनामै ८ हजार मिटरभन्दा अग्ला १४ वटा हिमाल आरोहण गरी विश्व रेकर्ड बनाएका थिए । हरिला भने उक्त रेकर्ड तोडेर नयाँ विश्व कीर्तिमान कायम गर्न संघर्षरत छिन् ।
