थानकोट । आफूभन्दा ३ गुणा लामो अजिंगरको आक्रमणबाट ५ वर्षका एक बालक नराम्ररी घाइते भएका छन् । आक्रमणपछि अजिंगरले ती बालकलाई घिसारेर स्विमिङ पुलसम्म लगेको थियो । यस क्रममा अजिंगरले बच्चालाई धेरै ठाउँमा टोक्यो पनि ।
संयोगवश, त्यतिबेला ती बालकका बुवा र हजुरबुवा स्विमिङ पुल वरिपरि नै थिए । उनीहरुले तत्कालै बच्चालाई अजिंगरको पकडबाट छुटाउन सफल भए ।५ वर्षीय ब्यू ब्लेक खासमा आफ्नो घरको स्विमिङ पुलमा स्विमिङ गर्ने तयारीमा थिए । त्यति नै बेला झाडीमा लुकेर बसेको अजिंगरले उनीमाथि हमला गरेको थियो ।
ब्यूका पिता बेन भन्छन्, ‘घटनाका बेला ब्यू स्विमिङ पुलको किनारामा टहलिरहेका थिए । मलाई लाग्छ कि अजिंगर पुलको किनारामा भएका झाडीमा शिकारको खोजीमा लुकेर बसिरहेको थियो । मैले नजिकैको झाडीबाट कालो छायाँजस्तो आकृति बाहिर निस्किएको देखे र उसले ब्यूको खुट्टातिर समात्यो ।’
पुलको छेउमा रहेका बालकका ७६ वर्षीय हजुरबुवाले तुरुन्तै स्विमिङ पुलमा हाम फालेर अजिङ्गरसहित बालकलाई स्विमिङ पुलबाट बाहिर निकाले ।मेलबर्न रेडियो स्टेशन थ्रीएडब्ल्यूसँग घटनाबारे कुरा गर्दै ब्यूका पिता बेनले भने, ‘बुवाले ब्यूलाई मतिर फ्याँकेपछि मैले १५–२० सेकेन्डमा उसलाई अजिंगरको चंगुलबाट छुटाएँ । त्यसपछि मैले करिब १० मिनेटसम्म अजिंगरलाई समातिरहेँ ताकि बुवा र बच्चालाई शान्त पार्न सकूँ । उनीहरु दुबैजना नराम्रोसँग डराएका थिए ।’
यतिबेला बचचाले पनि पूरा हिम्मत देखाए । उसलाई खासै धेरै चोट लागेन ।बेनले भने, ‘एकपटक बच्चाको शरीरबाट रगत सफा गरेपछि हामीले उसलाई नडराउन भन्यौँ । उसलाई अजिंगर विषालु हुँदैन पनि भन्यौँ ।’बेनको परिवार अष्ट्रेलियाको न्यू साउथ वेल्स प्रान्तको तटीय शहर बायरन बेमा बस्छ । घटनापछि बेनले आफूले बच्चाको शरीरको घाउलाई नियालिरहेको बताए । घाउबाट संक्रमण नहोस् भनेर उनले सुनिश्चित गरिरहेका छन् ।
रेडियो स्टेशनसँगको कुराकानीमा बेनले उक्त इलाकामा अजिंगर पाइनु निकै सामान्य भएको बताएका छन् । बच्चालाई छुटाएपछि बेनले अजिंगरलाई पुनः झाडीमा फ्याँकिदिए । उनले भने, ‘रोचक कुरा के छ भने छोडेपछि अजिंगर ‘सिन अफ क्राइम’ तर्फ फिर्ता भयो ।’
