हिन्दी समाचारका वरिष्ठ पत्रकार रविश कुमारले एनडीटीभीबाट राजिनामा दिएका छन्। हिन्दि भाषामा समाचार पढ्ने एक चर्चित अनुहार रविश कुमारले आफ्नो कार्यकालमा धेरै कार्यक्रमहरू आयोजना गरे जसमा हम लोग, रविश की रिपोर्ट, देश की बात र प्राइम टाइम समावेश छन्। रविश कुमारलाई दुई पटक पत्रकारितामा योगदानको लागि रामनाथ गोयन्का उत्कृष्टता पुरस्कार र २०१९ मा रामन म्यागसेसे पुरस्कार प्रदान गरिएको छ।
रविशको राजीनामा पछि, एनडीटीभी समूहका अध्यक्ष सुपर्णा सिंहले भने, “रविश जत्तिकै धेरै मानिसहरूलाई प्रभाव पार्न सक्ने पत्रकारहरू कमी छन्। यो उहाँलाई मानिसहरूको प्रतिक्रियामा देखिन्छ।” सुपर्णाले रविश दशकौंदेखि एनडीटीभीको अभिन्न अंग रहेको बताइन्। उनको योगदान ठूलो छ, र हामीलाई थाहा छ उनी आफ्नो नयाँ जीवनमा अत्यन्तै सफल हुनेछन्, उनले थपिन्।
रविश कुमारको राजीनामा यस्तो समयमा आएको हो जब एनडीटीभीका कार्यकारी सह-अध्यक्ष प्रणव रोयले एक दिन अघि निर्देशक पदबाट राजीनामा दिएका थिए। केही दिनयता रविश कुमारको राजीनामाको खबर आएको थियो । तर, बुधबार उनले औपचारिक रुपमा मेल पठाएर राजीनामा बुझाएका छन् ।
रविशको बिदाइको घोषणा गर्दै, च्यानलले आन्तरिक मेलमा उनको राजीनामा तुरुन्तै लागु भएको बताएको छ। यसको मतलब अब रविश एनडीटीभीको लागि शो गर्दै देखिने छैनन्। नयाँ दिल्ली टेलिभिजन लिमिटेड (एनडीटीभी)का संस्थापक प्रणय रोय र उनकी पत्नी राधिका रोयले प्रमोटर समूहको एक इकाई आरआरपीआर होल्डिङ प्रालिको निर्देशक पदबाट राजीनामा दिएका छन्।
अब अदानी समूह यो समाचार च्यानल प्राप्त गर्न करिव करिव नजिक पुगेको छ। यही घटनाक्रममा रोय दम्पतीले आरआरपीआर होल्डिङको निर्देशक पदबाट राजीनामा दिएका छन् ।
