नयाँ दिल्ली । कोरोना महामारीका कारण भारतमा पछिल्लो दुई वर्षदेखि बन्द रहेको व्यवसायिक अन्तर्राष्ट्रिय उडान पूर्ण रुपमा खुला गरिएको छ । भारतीय अधिकारीहरूका अनुसार २७ मार्च आइतबारबाट सबै अन्तर्राष्ट्रिय उडानलाई अनुमति दिएको छ ।
अब अन्तर्राष्ट्रिय उडान कोराना महामारीअघिको अवस्था जस्तै नियमित हुनेछन् । भारतले अन्तर्राष्ट्रिय उडानमा लगाएको प्रतिबन्ध खुलाएसँगै निजी कम्पनीका विमान कम्पनीहरुले भारतका विभिन्न सहरबाट टिकटको बुकिङ तथा उडान थालेका छन् ।
कोरोना बढेसँगै सन् २०२० को मार्च २३ बाट भारतले अन्तर्राष्ट्रिय उडान परिचालनमा कडाइ गरेको थियो । त्यसयता एयर बबल सम्झौता भएका देशहरुसँग मात्रै निश्चित संख्यामा उडान हुँदै आएको थियो ।
अब विमानका कर्मचारीले पीपीई किट लाउन नपर्नेसमेत व्यवस्था गरिएको छ । नयाँ निर्देशनमा विमानका सबै सिटमा यात्रु राख्न पाइने भनिएको छ । दिल्ली एयरपोर्टबाट अब ६० भन्दा बढी विदेशी सहरहरुसँगको ‘कनेक्टिभिटी’ सुरु हुने बताइएको छ ।
