कतार विश्वकपमा पुरस्कार राशी ४४० मिलियन डलर
कतारमा जारी २२ औं संस्करणको फिफा विश्वकप फुटबल २०२२ को फाइनल खेल १८ डेसेम्बर अर्थात पुष ३ गते भोलि हुँदैछ । फाइनल खेल अर्जेन्टिना र डिफेन्डिङ च्याम्पियन फ्रान्सबिच हुनेछ । फाइनलको विजेता, उपविजेता र अन्य सहभागि टीमहरुले कति नगद पुरस्कार पाउँछन् त्यो विषयमा अहिले सबैको चासो रहेको छ ।
आइतबार नेपाली समय अनुसार राती ८:४५ बजे शुभारम्भ हुने फाइनल खेलपछि विजेता र उपविजेता टोलीले मात्र नभै विश्वकपमा सहभागिता जनाउने टोलीले पनि करोडौं रुपैयाँ प्राप्त गर्नेछन् । त्यसमा तेश्रो र चौंथो हुने टोलीले अरवौं नगद पुरस्कार पाउने छन् । तेश्रो स्थानका लागि आज (शनिबार) क्रोएशिया र मोरक्कोबिच खेल हुँदैछ ।
कतारको दोहामा रहेको खलिफा स्टेडियममा आज नेपाली समयानुसार राति ८:४५ बजेबाट शुरु हुने प्ले अफमा युरोपियन राष्ट्र क्रोएशियाले अफ्रिकन राष्ट्र मोरक्कोको सामना गर्दैछ । आजको खेलपछि तेश्रो र चौंथो हुने टोलीको टुङ्गो लाग्नेछ ।
यो विश्वकपमा कुल पुरस्कार राशी ४४० मिलियन डलर रहेको छ । यो विश्वकपमा विजेता टोलीले सुनको ट्रफी सहित ४२ मिलियन डलर प्राप्त गर्नेछ । यो सन् २०१८ को विश्वकपमा राखिएको पुरस्कार राशी भन्दा ४ मिलियन डलर बढी हो । त्यस्तै उपविजेताले ३० मिलियन डलर प्राप्त गर्नेछ ।
यसैगरी विश्वकपमा सहभागि सबै ३२ राष्ट्रका टोलीलाई ९.९ मिलियन डलर दिइने छ । यसैगरि प्रि-क्वार्टरफाइनलमा पुगेका टोलीलाई १३ मिलियन डलर र क्वार्टरफाइनलसम्म टोलीलाई १७ मिलियन डलर पुरस्कार प्रदान गरिने छ ।
