शरीरका विभिन्न अंगले काम गर्न छाड्दै गएपछि सिकिस्त महान फुटबलर पेलेलाई हेर्न उनको परिवार अस्पतालमा भेला भएको छ । इज्रायलिटिया अल्बर्ट आइन्सटाइन अस्पतालमा उपचाररत ८२ वर्षीय पेलेलाई हेर्न छोरीहरु फ्लाभिया र केलीसँगै छोरा एडिन्हो पुगेका छन् । उनीहरुले अस्पतालमै पेलेसँग क्रिसमस मनाउँदैछन् ।
केलीले बुबासँग सुतिरहेको तस्विर सामाजिक सञ्जालमा पोस्ट गर्दै लेखेकी छन्- सँगै अर्को रात ।
पेलेको मुटु र किड्नीमा समस्या देखिएको छ भने क्यान्सर पनि बढ्दै गएको अन्तर्राष्ट्रिय सञ्चार माध्यमहरुले उल्लेख गरेका छन् । एडिन्होले सामाजिक सञ्जालमा बुबाको हात समाउँदै लेखेका छन्, ‘बुबा… मेरो शक्ति तपाईंको हो ।’
पेलेलाई पछिल्लोपटक गत नोभेम्बर २९ तारिखमा अस्पताल भर्ना गरिएको थियो । उनको किमोथेरापी भइरहेको छ । अस्पतालले पेलेलाई थप सघन उपचार आवश्यक रहेको उल्लेख गरेको छ ।
तीन पटकको विश्वकप विजेता उनी सन् २०१२ मा हिप रिप्लेसमेन्ट सर्जरी गराएपछि सार्वजनिक रूपमा विरलै देखा पर्ने गरेका छन् । उनले प्रोस्टेट र मिर्गौला समस्यासँग पनि लडिरहेका छन् ।
गत वर्ष पेलेका छोरा एडिन्होले उनका बुबा कमजोर स्वास्थ्य र कमजोर गतिशीलताका कारण “एक प्रकारको डिप्रेसन” सँग लडिरहेको बताएका थिए । पेलेले २१ वर्षको व्यावसायिक करियरमा १,३६३ खेलमा १,२८१ गोलको विश्व रेकर्ड बनाएका छन् । उनले ब्राजिलका लागि ९१ पटक क्याप गरेका थिए र ७७ अन्तर्राष्ट्रिय स्तरमा गोल गरेका थिए ।
