पोखरा विमान दुर्घटनाको शोकमा डुब्यो भारतको गाजीपुर, अलावलपुर अफ्गाको बजार नै बन्द
उत्तरप्रदेश । पोखरा अन्तर्राष्ट्रिय विमानस्थलमा अवतरण गर्ने क्रममा भएको विमान दुर्घटनामा गाउँमा चार जनाका युवाहरु परेपछि उत्तर प्रदेशको गाजीपुरको गाजीपुरको अलावलपुर अफगा गाउँ शोकमग्न भएको छ । भारतीय सरकारी समाचार एजेन्सी एएनआईका अनुसार सोमबार उनीहरुको मृत्युको शोकमा गाजीपुरको अलावलपुर अफ्गाको बजार नै बन्द गरिएको छ ।
पोखरा अन्तर्राष्ट्रिय विमानस्थलमा अवतरण गर्ने क्रममा ७२ सिटको यात्रुवाहक विमान दुर्घटनामा ६९ जनाको ज्यान गएको पुष्टि भइरहेको छ भने बेपत्ता रहेका ३ जनाको खोजी जारी छ । उनीहरु सबै २३ देखि २८ वर्ष उमेर समूहका थिए र यहाँ विभिन्न व्यवसाय सञ्चालन गर्दै आएका थिए ।
पशुपतिनाथको दर्शन गर्नेर पोखरामा प्याराग्लायडिङ गर्ने योजनासहित आएका उनीहरु आइतबार दुर्घटनामा परे । दुर्घटनामा परेका पाँच जनामध्ये चार जना उत्तर प्रदेशको गाजीपुर जिल्लाका बासिन्दा हुन् । दुर्घटनाको खबर आएपछि मृतकका आफन्तमा मात्रै हैन, बजार क्षेत्र नै शोकमा डुबेको छ ।
विमानमा सवार भारतका अभिषेक कुशवाहा (२५), विशाल शर्मा (२३), अनिल कुमार राजभर (२८), सोनु जैसवाल (२८) र सञ्जना जैसवाल थिए । जसमध्ये अभिषेक, विशाल, अनिल र सोनु गाजीपुरका बासिन्दा हुन् । उनीहरु चारैजना साथी थिए ।
उनीहरु विमानभित्र भिडियो खिच्दै रमाउँदै गर्दा एक्कासी दुर्घटनामा परेको दृश्यले गाउँलाई स्तब्ध बनाएको छ । सोनुले दुर्घटनाअघि विमानबाटै खिचेको भिडियो पनि आइतबार नै सार्वजनिक भएको छ ।
दुर्घटना हुँदा गाजीपुरका सोनु फेसबुकमा लाइभ थिए । सार्वजनिक भएको भिडियोमा पहिले उनले विमानको भित्री र बाहिरी दृश्यहरू देखाउँछन् । यस क्रममा केही सेकेन्डपछि विमान बेस्सरी हल्लिन्छ र विमान दुर्घटनाग्रस्त हुँदै अचानक आगो निस्कन्छ ।
सामाजिक सञ्जालमा दुर्घटनाअघि लाइभ गर्ने सोनु चकजैनाब निवासी राजेन्द्र जैसवालका छोरा सोनु जैसवाल पाँच दाजुभाइमध्ये कान्छो थिए । उनी वाराणसीमा रक्सी पसल चलाउँथे । उनी श्रीमती रागिनी जैसवाल, एक छोरा र छोरीसँग सारनाथमा बस्थे । सोही गाउँका अनिल राजभर दुई दाजुभाइमध्ये कान्छो थिए । उनको परिवार पनि अहिले गहिरो शोकमा छ ।
विमान दुर्घटनामा परेका अनिल जहुरावादमा र अभिषेक धरवानमा जनसेवा केन्द्र चलाउने गर्थे । अभिषेक दुई दाजुभाइमध्ये कान्छो भएपनि परिवारको खम्बा थिए । अभिषेकका बुबा चन्द्र मौर्यले आफू परिवारको एक मात्र कमाउने सदस्य भएको बताए । कुशवाहाका भाइ अभिनेशले भने, ‘म अचम्ममा परेको छु, अब के गर्ने थाहा छैन । उनको मृत्युको खबर सुनेपछि बुबा र आमाको अवस्था निकै नाजुक छ ।’
विशाल शर्मा अलावलपुरको बाइक एजेन्सीमा फाइनान्सको काम गर्थे । उनी अलावलपुर अफगान निवासी शर्मा टिभिएस बाइक एजेन्सीमा फाइनान्सको काम गर्थे । शर्माका बुबा सन्तोष शर्मा र आमा सरिता देवीसहित तीन दिदीबहिनी र एक भाइ छन् ।
विशाल शर्माको घरमा गाउँलेहरु दुःख व्यक्त गर्न भेला भएका छन् भने उनका जेठा दाजु र बुवासहित परिवार नै स्तब्ध छन् । शर्मा आफूहरू बीचमा रहेनन् भन्ने कुरा पत्याउन नसक्ने उनका साथीहरू बताउँछन् ।
‘उनीहरु चारै जान हाम्रा साथीजस्तै थिए, दुःखको यो घडीमा सिंगो गाउँ क्षेत्र दुर्घटनामा परेकाहरुका परिवारसँग उभिएको छ,’ एक पसल मालिकले भने,’आज कसैले बजारमा पसल खोलेका छैनन् ।’
